1 scaled

წმინდა იოანე სინელი – ვისაც ღმერთის ძეობა სურს, ყველა პოულობს მას

ვისაც ღმერთის ძეობა სურს, ყველა პოულობს მას, რადგან იგი არის ღმერთი და ცხოვრება ყოველთა: მორწმუნეთა და ურწმუნოთა, მართალთა და ცოდვილთა, უვნებობასა და ვნებაში მყოფთა, ღვთისმსახურთა და ურჯულოთა, ერისკაცთა და მონაზონთა, ბრძენთა და უსწავლელთა, ჯანმრთელთა და სნეულთა, ჭაბუკთა და მოხუცებულთა. როგორც ყველას ეფინება სინათლე, მზე და ჰაერი, ამგვარადვე, იგია ყველას სიცოცხლე და ყოველივე აღნიშნულის მომცემელი; და ვინც ეძებს პოულობს მას, “რამეთუ არა არს თუალთ-ღებაჲ ღმრთისა თანა” (რომ. 2;11).

ქრისტიანი არის ის, ვინც ქრისტეს იმდენად ემსგავსება, რამდენადაც ადამიანისთვისაა შესაძლებელი და საქმით, სიტყვითა და გონებით სწორად და უბიწოდ სწამს წმიდა სამება.
ღვთისმოყვარე არის იგი, ვინც არ ცვლის მას, რაც ბუნებრივია და უცოდველი, და არ დაიზარებს, რომელი კეთილი საქმის კეთებაც შეუძლია.
ფრთხილი ის არის, ვინც საცდურის, საფრთხისა და შფოთის დროს მათგან სრულიად შორს მყოფი საქმეების აღსრულებას ესწრაფვის.

ვნებებსა და უძლურებაში მყოფნი უიმედობას ნუ მივეცემით, არამედ ჩვენი სულიერი უძლურება და უსუსურობა შეუორგულებული სარწმუნოებით მარჯვენა ხელით მივართვათ ქრისტეს და ვაღიაროთ. და თუ საკუთარ თავს გამუდმებით ჩაიყვანთ თავმდაბლობის უფსკრულში, მაშინ ჩვენს ღირსებაზე აღმატებულ შეწევნას მისგან უეჭველად მივიღებთ.

წიგნიდან: “კლემაქსი ანუ კიბე”

ამონარიდში გამოყენებული ფოტო მასალა შექმნილია სპეციალურად საიტისთვის evqaristia.ge©

  •  
  •  
  •  
  •  
  •  
  •  
  •  
  •